Budaya teh ciciren ajen inajen hiji bangsa, dijerona mangrupa tata etika, perilaku, basa, seni jeung kabiasaan/adat istiadat nu luhung mere ciri ajen bangsa. Salaku warga ki Sunda nu agul ku kasundaanana, nu manghariwangkeun tur gede ka melang sok sieun Ki Sunda ilang dangiangna, sok inggis basa leungit tina kedalna, budaya ingkah tina jiwana para nonoman nu sakuduna sirung sirung harepan pikeun ngalanggengkeun hirup hurip ki Sunda. Medalna Bentang Sumedang Management teu leupas tina udagan ngawur bibit ka asih, nebar rasa kanyaah ka saban nonoman kana basa, seni jeung budaya Sunda, najan ukur ku mangrupa mateahkeun kana sagala kaparigelan sababaraha nonoman Sunda nu ngagaduhan ageung kanyaah kana kasundaanana, mugia janten binih nu sirungan akaran pikeun tauladan sangkan di tiron ku nonoman sejena.
Karumasa hengker ku kamampuh, lintang ti upaya muntang ka para inohong nu sami sami gaduh patekadan, mikaasih mikaheman ki sunda teu saukur cukup ku kedal basa pangajak, namung dibuktikeun ku babarengan dina ngabuktikeun, mere jalan ka para nonoman urang dina nembongkeun kaparigelanana, pikeun jadi sirung seniman nganteurkeun maranehanana ka mangsa jaga jadi budayawan sajati.
Nyanggakeun pangbakti ti BSM (Bentang Sumedang Management), kiwari tiasa katampi, harepan ka payun pribados tetep tiasa nanjeur dina patekadan istikomah ngokolakeun barudak ki Sunda pikeun anteng dina kasundaanana, tameng pikeun ki Sunda ulah nepi ka Jati kasilih ku junti.
Namung pribados gaduh karumaos, mustahil sim kuring ajeg panceg dina patekadan ieu sosoranganan. Pangrojong, pangdorong, langkung ti eta sasarengan dina majengkeun tarekah ieu tiasa urang wujudkeun ku sadayana.
Hatur nuhun, mugia katampi
Wassalamualaikum Warahmatullahi Wabarakatuh
Sumedang, 3 Januari 2011
Bentang Sumedang Management
Asep Anang Supriatna
